Tuesday 21 November 2017

মানুহৰ দাঁতে বহন কৰে ভিটামিন ডিৰ অভাৱৰ সাক্ষ্য

মানুহৰ দাঁতৰ পৰা দেহত ভিটামিন ডিৰ অভাৱ সম্পৰ্কে তথ্য পাব পাৰি৷ মেকমাষ্টাৰ বিশ্ববিদ্যালয়ৰ বিজ্ঞানীসকলে শেহতীয়াকৈ দাঁতৰ এক্স-ৰে’ পৰীক্ষাৰ দ্বাৰা এই তথ্য আৱিষ্কাৰ কৰিছে৷ 


বিজ্ঞানীসকলে পূৰ্বতে ধৰা পেলাইছিল যে মানুহৰ দাঁতৰ গঠন আৰু আকৃতিৰ পৰা ভিটামিন ডিৰ অভাৱৰ ফলত হোৱা ৰিকেটছ (rickets) ৰোগৰ স্থায়ী আৰু নিৰ্ভৰযোগ্য তথ্য পাব পাৰি৷ এই ভিটামিনৰ অভাৱত দাঁতৰ মূল অংশ ডেন্টিন (dentin) ত ক্ষুদ্ৰাতিক্ষুদ্ৰ বিকৃতি (deformities) আৰম্ভ হয়৷ এই ডেন্টিনৰ এনে বিকৃতিবোৰ এনামেল (enamel) নামৰ অংশই আৱৰি ৰাখে বাবে এইবোৰ ক্ষয় নাযায়৷ এই বৈশিষ্ট্যৰ বাবে প্ৰাচীন মানুহৰ দাঁত অধ্যয়ন কৰি তেওঁলোকৰ স্বাস্থ্য সম্পৰ্কেও তথ্য পাব পাৰি৷  কিন্তু ডেন্টিনৰ এই বিকৃতিসমূহ দাঁতবোৰ পৃথক কৰি তন্নতন্নকৈ পৰীক্ষা নকৰিলে ধৰা পেলোৱা প্ৰায় অসম্ভৱ ৷ এই অসুবিধা আঁতৰ কৰিবৰ বাবে বিজ্ঞানীৰ  দলটোৱে এক্স ৰে’ ব্যৱহাৰ কৰি দাঁতৰ ’পাল্প হৰ্ণ’ নামৰ অন্য এক অংশৰ গঠনৰ পৰিৱৰ্ত্তনৰ লগত তুলনা কৰি ভিটামিন ডিৰ পৰিমাণ নিৰ্ণয় কৰিব পৰাৰ পদ্ধতি উলিয়াইছে৷ এক্স ৰে’ত দেখা পোৱা দাঁতৰ মাজভাগত দেখা পোৱা ক’লা অংশটোক পাল্প হৰ্ণ বুলি কোৱা হয়৷ এই পাল্প হৰ্ণৰ আকাৰ পৰীক্ষা কৰি অতি সহজেই ভিটামিন ডিৰ অভাৱ নিৰ্ণয় কৰিব পৰা যায়৷

দাঁতৰ বিভিন্ন অংশসমূহৰ অৱস্থান আৰু ভিটামিন ডিৰ অভাৱত দেখা দিয়া বিকৃতি সমূহ ( b, c) 

সুস্থ মানুহ এজনৰ পাল্প অংশৰ আকৃতি ধেনুভিৰীয়া (ওপৰৰ চিত্ৰত a) হয় কিন্তু ভিটামিন ডিৰ অভাৱ হ’লে এই আকৃতি বেছি জোঙা (ওপৰৰ চিত্ৰত b) বা এমূৰে দীঘলীয়া হৈ চকী এখনৰ দৰে (ওপৰৰ চিত্ৰত c) হৈ পৰে৷ 


ভিটামিন ডিৰ অভাৱে আমাৰ দেহত নানা জটিলটাৰ সৃষ্টি কৰে৷ বিশেষকৈ আমাৰ দেহৰ হাড়ৰ গঠনত এই ভিটামিনৰ ভূমিকা অতি গুৰুত্বপূৰ্ণ৷ এক্স ৰে’ৰ দ্বাৰা দাঁতৰ পাল্প অংশৰ নিয়মীয়া পৰীক্ষাৰ দ্বাৰাই এই অভাৱ চিনাক্ত কৰাৰ পদ্ধতিয়ে এনে জটিলটাসমূহ সময়মতে ৰোধ কৰাৰ পথ মুকলি কৰিছে৷

No comments:

Post a Comment