Sunday 5 November 2017

ঘোঁৰাই বুজিব পাৰে মানুহৰ দেহৰ ভাষা

ঘোঁৰাই মানুহৰ দেহৰ ভাষা (body language) অধ্যয়ন কৰি কৰ্তৃত্বশীল আৰু আজ্ঞাধীন মানুহৰ পাৰ্থক্য বুজিব পাৰে৷ ছাছেক্স বিশ্ববিদ্যালয় (University of Sussex) ৰ বিজ্ঞানীসকলে শেহতীয়া এক গৱেষণাৰ যোগেদি এই তথ্য আৱিষ্কাৰ কৰিছে৷ এই গৱেষণাই জীৱ-জন্তুৱে দেহৰ ভাষা অধ্যয়নৰ দ্বাৰা অন্য প্ৰজাতিৰ সৈতে কেনেকৈ যোগাযোগ কৰিব পাৰে সেই বিষয়ে আমাক নতুন বাতৰি দিছে৷ 

ঘোঁৰাই কৰ্তৃত্বশীল লোক (বাওঁফালে)ৰ সলনি আজ্ঞাধীন লোক (সোঁফালে) হে পছন্দ কৰে


বিশ্ববিদ্যালয়ৰ মনোবিজ্ঞানীসকলে ত্ৰিছটা পোহনীয়া ঘোঁৰাৰ ওপৰত এই বিষয়ত পৰীক্ষা চলায়৷ তেওঁলোকে ঘোঁৰাবোৰে কৰ্তৃত্বশীল (dominant) ৰূপে (ভৰি-হাত মেলি ৰাখি আৰু বুকু ফুলাই থাকি) পোনকৈ থিয় দিয়া মানুহ এজন নে আজ্ঞাধীন (submissive) ৰূপে (ভৰি-হাত দেহৰ ওচৰত আৰু সহজভাৱে) থকা মানুহ এজনৰ ওচৰ চাপে সেয়া পৰীক্ষা কৰে৷ দেখা গ’ল যে দেহৰ ভাষা নিৰপেক্ষভাৱে ৰাখি ইয়াৰ প্ৰত্যেকজন ব্যক্তিয়ে পোনতে ঘোঁৰাবোৰক খাদ্য খাবলৈ দি প্ৰলোভিত কৰি ৰখাৰ পিছতো তেওঁলোকৰ দেহৰ ভাষা সলনি হোৱাৰ লগে লগে ঘোঁৰাবোৰৰ প্ৰতিক্ৰিয়াও সলনি হয়৷ ঘোঁৰাবোৰে সহজভাৱে থকা আজ্ঞাধীন ধৰণৰ মানুহৰহে কাষ চাপিব খোঁজে৷  

ইতিহাসৰ বিভিন্ন কাহিনীত ঘোঁৰাই মানুহৰ মনৰ ভাব বুজি কাম কৰাৰ উল্লেখ পোৱা যায় যদিও বৈজ্ঞানিকভাৱে কোনো গৱেষণাত এই কথা প্ৰমাণ হোৱা নাছিল৷ গতিকে এই গৱেষণাই বেলেগ বেলেগ প্ৰজাতিৰ মাজত হোৱা যোগাযোগ সম্পৰ্কে নতুনকৈ প্ৰশ্নৰ অৱতাৰণা কৰিছে৷

No comments:

Post a Comment