ৰোমান্টিক সম্পৰ্কই হওক বা জীৱনৰ অন্য কোনো সম্পৰ্কই হওক, আমি প্ৰত্যেকেই বেলেগ বেলেগ ধৰণে ভালপোৱা অনুভৱ কৰোঁ আৰু অন্যৰ প্ৰতি সেয়া প্ৰকাশ কৰোঁ৷ গৱেষণাই দেখুৱাইছে যে প্ৰত্যেক ব্যক্তিয়ে এক বিশেষ ভাষাৰে প্ৰেম বা ভালপোৱা প্ৰকাশ কৰে আৰু অন্যই সেই একে ভাষাৰে প্ৰকাশ কৰা ভালপোৱাৰ প্ৰতিহে সঁহাৰি জনায়৷ এই প্ৰেমৰ ভাষাৰ ভিত্তিতেই প্ৰত্যেক সম্পৰ্ক গঢ় লয় আৰু প্ৰেমৰ ভাষাৰ ভিন্নতাই কেতিয়াবা হৃদয়ৰ সঁচা বান্ধোনতো বাধা আনি দিয়ে৷ গতিকে এই প্ৰেমৰ ভাষাৰ পাৰস্পৰিক অমিল-মিল সম্পৰ্কে অৱগত হোৱাটো যিকোনো সুখী আৰু পৰিপূৰ্ণ সম্পৰ্ক গঢ়াৰ বাবে অপৰিহাৰ্য্য৷
যিকোনো মানুহে মূলত: পাঁচবিধ ভাষাৰে ভালপোৱা অনুভৱ আৰু প্ৰকাশ কৰে- মৰমৰ মাত-কথা (Words of Affirmation), বৈশিষ্টপূৰ্ণ সময় (Quality Time), শাৰীৰিক সংস্পৰ্শ (Physical Touch), নিস্বাৰ্থ সহায় (Acts of Service) আৰু উপহাৰ (Receiving Gifts)৷ এই পাঁচবিধ প্ৰেমৰ ভাষা সম্পৰ্কে ডা° গেৰি চেপমেনে তেওঁৰ 'The Five Love Languages' নামৰ গ্ৰন্থখনত বিস্তৃতভাৱে আলোচনা কৰিছে৷ আপোনাৰ বাবে প্ৰেমৰ প্ৰাথমিক ভাষা কি জানেনে? সেয়া জানিবলৈ ডা° চেপমেনে প্ৰস্তুত কৰা এই কুইজে সহায় কৰিব পাৰে৷
মৰমৰ মাত-কথা গভীৰভাৱে বুজাসকলে ভালপোৱা অনুভৱ কৰে প্ৰশংসা, উৎসাহ বা সমৰ্থনদায়ী শব্দৰে৷ তেওঁলোকৰ বাবে আন্তৰিক সম্পৰ্কত মৰমৰ মাত এষাৰ, প্ৰশংসাৰ এটি বাক্যই গভীৰ সাঁচ বহুৱায় যায়৷ তেনেদৰে বৈশিষ্টপূৰ্ণ সময়ৰ ভাষাৰে ভালপোৱা সকলৰ বাবে আপোনজনৰ সম্পূৰ্ণ মনোযোগ অত্যন্ত গুৰুত্বপূৰ্ণ৷ শাৰীৰিক সংস্পৰ্শ ভাষী গৰাকীয়ে ভালপোৱা অনুভৱ কৰে হাত, চুলি বা কান্ধত ক্ষণিক স্পৰ্শৰ পৰা আলিংগনকে আদি কৰি যিকোনো শাৰীৰিক সংস্পৰ্শৰ যোগেদি৷ নিস্বাৰ্থ সহায়ৰ ভাষা বুজা লোকসকলৰ বাবে আপোনজনে সুচিন্তাপূৰ্ণ কোনো কাম কৰি, সহায় আগবঢ়াই সম্পৰ্কৰ বান্ধোন কটকটীয়া কৰিব পাৰে৷ একেদৰে অন্য বহুতৰ বাবে একোটা ভাল লগা উপহাৰ আৰু সেই উপহাৰৰ আঁৰত থকা প্ৰচেষ্টা খিনিয়ে ভালপোৱাৰ অনুভৱ আনি দিয়ে৷
সম্পৰ্ক এটা গঢ় লওঁতে দুগৰাকী ব্যক্তিৰ মাজত প্ৰেমৰ ভাষাৰ ভিন্নতা দেখা দিয়াটোৱে স্বাভাৱিক৷ কিন্তু এই সম্পৰ্কে অৱগত হোৱাৰ পিছত যিকোনো লোকেই আপোনজনৰ প্ৰেমৰ প্ৰাথমিক ভাষাৰে ভালপোৱা প্ৰকাশ কৰিবলৈ শিকিব পাৰে৷ যিকোনো সম্পৰ্ক সুমধুৰ আৰু দৃঢ় কৰি তোলাৰ বাবে এই প্ৰেমৰ ভাষা বুজা আৰু শিকাই আটাইতকৈ গুৰুত্বপূৰ্ণ উপায়৷
No comments:
Post a Comment