পূৰ্বৰ খণ্ডত-
পাহাৰী নগৰী হাক'নেত
প্ৰশান্ত মহাসাগৰৰ পাৰৰ অ'ডাৱাৰা ট্ৰেইন ষ্টেচন। তাত দিনটোৰ পঞ্চমখন ট্ৰেইনত উঠি উপলব্ধি কৰিলোঁ, যাত্ৰীৰ যথেষ্ট ভিৰ! বহিবলৈ আসন পোৱাই টান। এখন খালী আসন দেখি কাইলক ক'লোঁ, 'সৌ তাতে বহাগৈ। শেষ ট্ৰেইন যেতিয়া এইখিনি মই থিয়ৈ যাব পৰিম!'
সি এনেয়ে মোক প্ৰথমে বহিবলৈ জোৰ কৰে। আজি পিছে মূৰ দুপিয়াই পোনেই বহি পৰিল। বুজিলোঁ, কাইল ভাগৰিছে। জাপনৰ উত্তৰ প্ৰান্তৰ নিক্ক'ৰ পৰা আজি তেনেই পুৱাতে ওলোৱা। দিনৰ দিনটো ইখনৰ পিছত সিখন ট্ৰেইন ধৰি এতিয়া দক্ষিণৰ সাগৰৰ কাষ চাপিছোঁহি। তাতে যোৱা নিশাৰে পৰা কাইলৰ জ্বৰ জ্বৰ ভাৱ!
 |
| পাঁচখন ট্ৰেইনেৰে জাপানৰ নিক্ক' টাউনৰ পৰা হাক'নেলৈ |
সঁচাকৈয়ে ট্ৰেইনখনে কেইবাঠাইত ক্ষন্তেক থমকি ৰৈ দিশ সলনি কৰি (চুইচবেক ব্যৱস্থাৰে) পাহাৰৰ ওপৰলৈ বগাবলৈ আৰম্ভ কৰিলে। তাৰ লগে লগে মোৰ দুচকুৰ সন্মুখত ধৰা দিলে, শাৰী শাৰী পাহাৰৰ অপৰূপ সেউজীয়া, শিলনিৰ বুকুৰে অকোঁৱা পকোঁৱাকৈ বৈ যোৱা নদী আৰু সেই ভূচিত্ৰৰ মাজে মাজে জাপানী ঘৰ আৰু বাঁৰী। এখন জীৱন্ত তুলিকাৰ দৰে সেই ৰূপে গোটেই সময়ছোৱা মোক বিমুগ্ধ কৰি ৰাখিলে।
 |
| ট্ৰেইনৰ পৰা দেখা পোৱা হাক'নেৰ সেউজীয়া |
গ'ৰা ষ্টেচনত নামোঁগৈ মানে সিদিনা আবেলি চাৰি বাজিল। এয়া জাপানৰ কানাগাৱা প্ৰিফেকচাৰৰ পাহাৰীয়া চহৰ হাক'নে। হাকনে আচলতে কেইবাখনো সৰু সৰু গাৱঁৰ সমষ্টি। তাৰে কণমানি এখন নিৰিবিলি পাহাৰীয়া গাওঁ গ'ৰা। ষ্টেচনৰ পৰা আমাৰ এয়াৰ বিএনবিৰ ঘৰলৈ খোজেৰে প্ৰায় দহমিনিটৰ বাট। ঘৰটোৰ নাম- গ'ৰা বেইছ ১০১ (Gora Base 101)। গৃহস্থ মেকুৱে ইতিমধ্যে অনলাইন বিশদ নিৰ্দেশনা দি থৈছে- বাটৰ আৰু ঘৰৰ। লগতে সকীয়াই থৈছে গুগল মেপৰ ঠিকনা চাই ঘৰ উলিয়াব নোৱাৰি। তাৰ সলনি তেওঁ নিজে ফটোৰে সৈতে বাটৰ নিৰ্দেশনা দিছে। তাকে চাই দুয়ো খোজ দিলোঁ। কিন্তু অলপ আগবাঢ়িয়ে খেলিমেলি লাগি গ'ল।
 |
| মেকুৰ ঘৰলৈ নিৰ্দেশনা! |
চৌদিশে সৰু সৰু ওখ-চাপৰ পাহাৰীয়া বাট। প্ৰায়বোৰ বাট বা কেঁকুৰিত কোনো নাম বা চিন নাই। আনকি মেকুৰ ফটোৰে সৈতে দিয়া নিৰ্দেশনায়ো সহায় নকৰিলে। এটা কণমানি তিনিআলিৰ মাজত থিয় দি ফোনৰ নিৰ্দেশনা চাই থাকোঁতে এগৰাকী জাপানী মহিলা কাষ চাপি আহিল। জাপানী ভাষাৰে আমাক সুধিলে, কিবা সহায়ৰ প্ৰয়োজন নেকি! অনুমানতে ক'লোঁ, ঘৰ বিচাৰি পোৱা নাই। এইবাৰ তেৱোঁ মেপ চাই বুজাবলৈ আৰম্ভ কৰিলে। জাপানী ভাষাত কোৱা এটা শব্দও বুজি নাপালোঁ কিন্তু আমাক সহায় কৰাৰ আন্তৰিক প্ৰচেষ্টা দেখি মূৰ দোঁৱাই দুয়ো তেওঁক ধন্যবাদ জনালোঁ।
'কেনি যাব লাগে কিবা বুজিলানে?' তেওঁ যোৱাৰ দিশে চাই মই কাইলক সুধিলোঁ।
'ওহো- একোৱে নুবুজিলোঁ! কিন্তু তেওঁ এই বাওঁহাতে আঙুলীয়াইছিল নহয়-এইফালেই কিজানি।' কাইলে ক'লে।
 |
| হাক'নেৰ বাট |
মেকুৱে দিয়া স্মাৰ্ট কীৰ ক'ড দি ঘৰৰ দুৱাৰ খুলিলোঁ। এটা আধুনিক ষ্টুডিঅ' এপাৰ্টমেণ্ট। বহা-কোঠাৰ কাষতে দুখলপীয়া বিছনা মানে বাংক বেড। তাত বয়-বস্তু থৈয়ে দুয়ো পুনৰ ওলাই আহিলোঁ- আন্ধাৰ নমাৰ আগেয়ে গ'ৰা টাউনখন চাওঁ বুলি। কাইলে ক'লে,
'ইয়াত ৭-১১ এখন আছে- তাতে দৰকাৰী বয়-বস্তুও কিনিব পাৰিম।'
এই আমেৰিকান কনভেনিয়েন্স ষ্ট'ৰ বা দোকান ৭-১১ ৰ জাপানত জনপ্ৰিয়তাৰ কথা শুনি আহিছোঁ। কিন্তু এতিয়ালৈকে আমি আশা কৰাৰ দৰে সকলো ঠাইতে ৭-১১ দেখিবলৈহে পোৱা নাই। কানাডাত প্ৰতিটো কোণতে অলেখ-অসংখ্য ৭-১১ ৰ দোকান। সেয়ে ইয়াৰ জাপানী ৰূপ চাওঁ বুলি তালৈকে ওলালোঁ। গুগুল মেপৰ মতে খোজেৰে মাথোঁ বিছ মিনিটৰ বাট। পিছে মূল বাটেৰে নগৈ হাবিৰ মাজেৰে সেয়া চমু বাট। হাবিতলীয়া বাটটোত ঠেক পকী চিৰি। দুয়োফালে বাঁহনি। সেইবাটেৰে যিমানে পাহাৰৰ তললৈ নামিলোঁ সিমানেই বাটটো থিয় হৈ আহিল- ওখ-চাপৰ ঠেক চিৰিত উজুটি নাখাবলৈ খুপি খুপি যাবলৈ আৰম্ভ কৰিলোঁ।
'এই ৭-১১ বিচৰাৰ অভিযান ভবাতকৈও বেছি এডভেঞ্চেৰাছ হ'ব যেন পাইছোঁ।' কাইলে ক'লে।
'একো নাই, উভতাৰ পৰত টেক্সি বা বাছ লৈ ল'ম দিয়া।' সান্তনাৰ সুৰত ক'লোঁ। এই চিৰিৰে পাহাৰৰ ওপৰলৈ বগোৱাৰ কথা ভাৱিবৰে ইচ্ছা নহ'ল মোৰ। এনেতে দেখা পালোঁ দুগৰাকী জাপানী পৰ্য্যটক চিৰিৰে ওপৰলৈ বগাই আহিছে। দেখাত মাক-জীয়েক যেন ভাৱ হ'ল। দুয়োৰে হাতত এটাকৈ প্ৰকাণ্ড চ্যুটকেছ। কেঁকো-জেঁকোকৈ বেগ দুটা চিৰিৰে ওপৰলৈ উঠাইছে। তেওঁলোকৰ দুচকুৰ ক্লান্তি দেখি পুতৌ উপজিল।
 |
| হাক'নেৰ হায়া নদী |
'আৰিগাট' গজাইমাছ!' মাক-জীয়েক দুয়ো স্বস্তিৰ হাঁহি এটা মাৰি আগবাঢ়িল।
পাহাৰৰ নামনিত হায়া নদীৰ ওপৰত এখন কাঠৰ দলং।নৈৰ দুয়োপাৰৰ শাৰদী ৰং উপভোগ কৰি তাতে কিছুপৰ জিৰাই ল'লোঁ। সিপাৰে মিয়াগিন' গাওঁ। তাৰ মূল বাটৰ কাষতে ৭-১১। দোকানখন অন্য কনভেনিয়েন্স ষ্ট'ৰৰ দৰেই। দৈনন্দিন জীৱনত প্ৰয়োজনীয় সকলো বয়-বস্তুৰে ঠাহ্ খাই আছে। পিছদিনা খাবলৈ দুই এবিধ বস্তু লৈ এইবাৰ আকৌ উভতনি যাত্ৰা। গম পালোঁ, বাছ বা টেক্সিৰ বাবে আধাঘণ্টা বাট চাব লাগিব। অগ্যতা দুয়ো টৰ্চ উলিয়াই ল'লোঁ। হায়া নদী পাৰ হৈ সেই একেই থিয় চিৰিৰে পাহাৰ বগাবলৈ আৰম্ভ কৰিলোঁ। এইবাৰো প্ৰকাণ্ড বেগৰ সৈতে যুঁজি থকা কেইবাগৰাকী পৰ্য্যটকৰ সৈতে মুখামুখি হ'ল। ভাৱ হ'ল, প্ৰায়বোৰ হোটেল বা থকা ঠাইলৈ কিজানি এই বাটেই চমূ বাট। সেয়ে সকলো বাধ্য হৈ এই বাটকে লৈছে।
এয়াৰ বিন এনবিৰ ঘৰ পাই কাইল পোনেই বিছনাত পৰিলগৈ। সন্ধিয়াৰ অভিযানে হয়তো জ্বৰ আৰু গাৰ বিষৰ প্ৰকোপ বঢ়ালেহে। অন্ধকাৰ আৰু নিস্তব্ধতাই মাজৰাতি যেন ভাৱ আনিলেও তেতিয়া মাথোঁ সন্ধিয়া সাত বাজিছেহে। সেয়ে চোফাত আৰামকৈ বহি লৈ মই পিছদিনাৰ পৰিকল্পনা কৰাত লাগিলোঁ। মূল লক্ষ্য, মানুহৰ সোঁতৰ পৰা কেনেকৈ হাত সৰা যায়!
জাপানৰ হাক'নে পৰ্যটকৰ মাজত ভীষণ জনপ্ৰিয়। ইয়াৰ এক প্ৰধান আকৰ্ষণ হাক'নে লুপ (Hakone loop) -এটা বৃত্তাকাৰ পথ যি অৱাকুডানিৰ আগ্নেয়গিৰিৰ পৰা অপৰূপ অশ্বি হ্ৰদলৈকে অঞ্চলটোৰ সকলোবোৰ পৰ্য্যটনৰ আকৰ্ষণ সামৰি লৈছে। এই বৃত্তাকাৰ পথৰ পৰিৱহণ ব্যৱস্থাও অভিনৱ। সমগ্ৰ পথটো সংযোগ কৰিছে বাছ, কেবল কাৰ, আকাশী পথ (rope way) আৰু জলদস্যুৰ নাওঁ (Pirate ship)-এ! গতিকে পৰ্য্যটকে হাক'নেৰ প্ৰাকৃতিক আৰু সাংস্কৃতিক ৰূপ উপভোগ কৰাৰ লগতে এই যাত্ৰাৰ অপূৰ্ব অভিজ্ঞতাৰ সোৱাদো ল'ব পাৰে। সেইবাবেই কণমানি হাক'নেত পৰ্য্যটকৰ ভিৰৰ মাত্ৰাও বেছি। শুনিছোঁ, প্ৰায়বোৰ ঠাইতে মানুহৰ সৈতে দীঘলীয়া শাৰীত ৰৈ থাকোঁতেই বহুপৰ যায়। সেয়ে অনলাইন খুঁচৰিলোঁ-'how to beat the crowd at Hakone?' উপায় উলিয়াবলৈ গুগলৰ বেছি পৰ নালাগিল।
 |
| হাক'নে লুপ ( চিত্ৰ: গুগল) |
প্ৰায়বোৰ পৰ্য্যটকে হেনো কেবল কাৰ আৰু আকাশী পথেৰে এই যাত্ৰা আৰম্ভ কৰি আবেলিলৈ হ্ৰদৰ পাৰ পায়হি। গতিকে গুগলৰ উপদেশ-বিপৰীত মূৰত আৰম্ভ কৰিলে মানুহৰ ভিৰ কম থাকিব। বৰ উৎসাহেৰে মাত দিলোঁ, 'কাইল, কাইলৈ আমি হাক'নে লুপ ওলোটাকৈ আৰম্ভ কৰিম দেই!'
'কাইল?!'
একো উত্তৰ নাপাই ঘুৰি চালোঁ। কাইল ইতিমধ্যে টোপনিৰ কোলাত!
 |
| হাক'নেৰ চুবুৰীয়া ঘৰটোত জাননী |
